Ekonomika Analizo Malkonsilas La Anglan

El UEA-vikio
Iri al: navigado, serĉi

Ekonomika analizo malkonsilas la anglan

La profesoro de la Ĝeneva Universitato kaj specialisto pri lingvoekonomiko François Grin publikigis ampleksan dosieron, kie li analizas la lingvan politikon de Eŭropa Unio. La studon petis kaj eldonis la Alta Konsilio pri Taksado de la Lernejo, franca publika organizaĵo aŭtonoma, kiu taksas kaj analizas la staton de instruado en Francio.

La informo starigas la demandon, kiu estus la optimuma elekto pri la laborlingvoj en Eŭropa Unio. Por tion fari, ĝi studas la nunan situacion kaj konkludas, ke la enspezoj, kiujn Britio ricevas de la superregado de la angla en la mondo, kaj ankaŭ en Eŭropa Unio, estas po 17-18 miliardoj da eŭroj jare, t.e. 1% de ĝia malneta nacia produkto. Tiun kvanton ĝi ricevas el la vendado de libroj kaj de aliaj varoj ligitaj al la angla lingvo kaj el la 700 000 homoj ĉiujare vizitantaj Anglion por lerni la lingvon, krom ankaŭ el la ŝparoj devenantaj de la neglektado de la fremdlingva instruado en la britaj lernejoj. Ne temas pri la tuto de la ekonomiaj transpagoj al la Unuiĝinta Reĝlando pro lingvaj kaŭzoj, sed pri 75 % el ili, kion la aŭtoro estimas kiel frukton de la hegemonio de la angla kaj ne nur de la demografia pezo de la lingvo mem. El tio rezultas, ke ĉiu el el 280 milionoj da ne-anglalingvanoj de la Unio jare subvencias per 65 eŭroj la britan ekonomion.

Kvankam tiuj nombroj estis jam publikaj inter specialistoj, mankis analizo, ĉu tiuj kostoj estus pli malaltaj, se oni elektus aliajn eblecojn, kiel tiujn, kiujn la laboraĵo formulas. Per la plilarĝigo de la Komunumo al 25 landoj en la pasinta jaro, la oficialaj lingvoj leviĝis de 11 al 20, kaj fariĝis 21 per la ĵusa akcepto de la irlanda – sed ne de la kataluna. Tio starigas dubojn pri la egaleca politiko inter la ŝtataj lingvoj de Eŭropa Unio, establita en la tempo de ĝia fondo, kiam ili estis nur kvar, kaj pensigas pri sistemo kun unu aŭ kun malgranda grupo de laborlingvoj, kiu iom post iom ŝajne sin trudas.

Esperanto la ebleco pri efika kaj justa

La svisa ekonomikisto proponas komparon inter tri eblaj scenejoj: la angla kiel sola lingvo, trilingveco angla-germana-franca kaj la elekto de esperanto kiel interna laborlingvo en la uniaj organoj. La unua ebleco pligrandigus la ekomoniajn transpagojn al la anglosaksaj landoj. Male, la studaĵo konkludas, ke la trilingva ebleco havas koston similan al la unua, sed kun pli granda egaleco. Tamen ĝi konsideras, ke ĝi lamas pro “ioma malstabileco” kaj ke ĝi postulas konsiderindan kvanton da rimedoj por efektivigi ĝin.

La tria ebleco, esperanto kiel sola interna laborlingvo, aperas, kun granda diferenco, kiel la plej malmultekosta kaj egaleca. La ŝparojn oni sukcesus per du vojoj. Unuflanke, la simpleco de esperanto permesus malpli investi en la instruado de fremdaj lingvoj – kvankam la studo antaŭvidas la lernadon de dua fremda lingvo en la lernejoj de ĉiu membroŝatoj, inkluzive de la Unuiĝinta Reĝlando – kaj, de alia flanko, ĉar ĝi estas nenies lingvo, la varojn kaj servojn ligitajn al ĝia instruado oni povus egale produkti en ĉiuj landoj, kio kreus valoron en ĉiuj.

Profesoro Grin mallonge analizas ankaŭ la realigeblon de ĉi tiu tria ebleco, kiun li konsideras “neefektivegebla en mallonga tempo”, sed ebla en la daŭro de unu generacio. “85% de la loĝantaro de la Eŭropo de la 25 havas en tio rektan kaj evidentan intereson, sendepende de la kulturaj kaj politikaj riskoj kuntrenataj de la lingva hegemonio”, li asertas.

Kataluna Esperanto-Asocio

kea@esperanto-ct.org

http://www.esperanto-ct.org


Finaj notoj

La dosieron eblas elŝuti el: http://cisad.adc.education.fr/hcee/documents/rapport_Grin.pdf

Biografiaj notoj pri prof. Grin:

http://www.geneve.ch/sred/collaborateurs/pagesperso/d-h/grinfrancois/francoisgrin.html (fr) http://www.geneve.ch/sred/collaborateurs/pagesperso/d-h/grinfrancois/francoisgrin_eng.html (en)

Vivprotokolo de prof. Grin: http://www.mic.unisi.ch/grin_cv.pdf

Partopreno de prof. Grin en la 10a Linguapax-Kongreso (Barcelono, 2004): http://www.linguapax.org/congres04/indexcat.html

Haut Conseil de l’Évaluation de l’École: http://cisad.adc.education.fr/hcee/