Pardonpeton!

La vera aspekto de la retejo ne povas por esti korekte rigardata per via retumilo.
La adreso:
Universala Esperanto-Asocio
Nieuwe Binnenweg 176, 3015 BJ Rotterdam, Nederlando
tel.: +31 10 436 1044
faks.: +49 30 364280169
rete: vidu la liston
 
UK 1996
UK 1996
PRAGAJ SONORILOJ

Vesperaj, n-o 7

Kongresa Kuriero, Mardo 23.7.1996


Belartaj konkursoj de UEA

POEZIO: 1. ne aljuĝita; 2. En stacidomo de Mauro Nervi, Italio; 3. Veraj koloroj de Anatole Tarás Lubovich, Usono. Honora mencio: Don Juan Tenorio de Mauro Nervi. Partoprenis 50 poemoj de 22 aŭtoroj el 16 landoj.

PROZO: 1. ne aljuĝita; 2. Bonan matenon! de Sten Johansson, Svedio; 3. Nokta halto de Sten Johansson kaj La pluŝa kato de Cristina de’Giorgi, Italio. Partoprenis 26 verkoj de 18 aŭtoroj el 11 landoj.

TEATRAĴOJ: 1. ne aljuĝita; 2. La ruĝaj formikoj de Georges Lagrange, Francio; 3. Nepo benita de Sten Johansson, Svedio. Partoprenis 11 teatraĵoj de 9 aŭtoroj el 6 landoj.

ESEO: Premio Luigi Minnaja: ...strebad’ iel valoras eĉ en duongrad’ de Olle Hällefors, Svedio; 2. Plurlingvismo kaj unulingvismo en Eŭropo tra la jarcentoj de Gian Carlo Fighiera, Italio; 3. La ĉeĥa literaturo en la spegulo de la Esperantaj tradukoj de Oldr ich Kní chal, Hungario. Partoprenis 8 eseoj de 7 aŭtoroj el 5 landoj.

KANTO: Premio An Song-san: Tiu ĉi de Tarcí sto José de Lima, Brazilo; 2. Io lanta de Tarcí sio José de Lima; 3. Ho mia land’ de Fiorello Fiorentin, teksto, kaj Aldo Fiorentin, muziko, Italio; kaj Hej! Hipopotamo de Mike Sadler, Hungario. Partoprenis 8 kantoj de 4 aŭtoroj aŭ aŭtoraj duopoj el 4 landoj.

INFANLIBRO DE LA JARO 1995: La infanoj en la arboj de Gudrun Pausewang, tradukita de Nora Caragea, eldonita de Inter-Kulturo, Slovenio. Partoprenis 4 libroj de 4 eldonejoj el 4 landoj.

Novaĵoj el Aŭstrio

Jam ekde 1990 la Internacia Esperanto-Muzeo en Vieno katalogigas siajn librojn rekte en la biblioteka komputila sistemo. Tiel iom post iom kreiĝas elektronika katalogo, kiu enhavos ĉiujn librojn de Internacia Esperanto-Muzeo. Tiu katalogo estas parto de la sistemo de la Aŭstria Nacia Biblioteko kaj tiel konsultebla per INTERRETO en la tuta mondo.

-http://www.onb.ac.at/intespm.htm

direktoro mag. Herbert MAYER

e-poŝto: mayer@grill.onb.ac.at

Korektoj de niaj preseraroj:

En la artikolo pri la ĉefa kunsido de IPTEA en la numero 4, 3-a paĝo ni ne ĝuste publikigis la nomon de la prezidanto de IPTEA, s ro Mäki-Luopa. Ni korektas la eraron kaj petas pardonon.

Ĉar la informoj de la akceptejo ne estis kompletaj, ni ne bone indikis la patrujon de s-ino Ina Tautorat, KN 2946, ŝi alvenis el Germanio, el urbo Berlino.

Afrika agado

Kunvenon de la Afrika Agado lunde partoprenis reprezentantoj de kvar afrikaj landoj, Alĝerio, Ganao, Madagaskaro kaj Togolando. En proksimume tridek afrikaj ŝtatoj oni lernas Esperanton el lernolibroj anglaj, francaj, portugalaj k.s., sed ili havas malmulte da ili por propagandado kaj bezonas helpon de esperantistoj el aliaj kontimentoj. Ankaŭ proprajn verkojn kaj tradukojn de afrika literaturo ili havas preparitaj, sed bezonas financan helpon por eldonado. Por ambaŭ celoj servas Afrika Fondaĵo de UEA, kiun prizorgas s-ro Hans Bakkev. Por ricevi pli detalajn ajn informojn pri afrika kulturo, kontaktu Jaŭ el Ganao, KN 2848.

Monumento antaŭ la kongresejo

Antaŭ la ĉefa enirejo, post la statuo, vi povas trovi sur herbobedo tilion kaj ŝtonblokon kun jena surskribo: "Ĉi tiu tilio estis plantita por memoro pri la centjara datreveno de Esperanto kaj la okdek-kvina datreveno de la esperantista klubo en Praha. KEP 1987" De la alia flanko estis fiksita sur la ŝtonego granda tabulo kun surskribo: "Honore al la 81-a kongreso de Esperanto en jaro 1996."

Ĉeĥaj artistoj al la 81-a UK

Apud operkantistoj, konataj jam inter esperantistoj (Miroslav Smycka, Josef Vích, Václav Halíř, Helena Halírová-Supová ), kaj same famaj violonisto Jan Duda kaj klarnetistino Bohuslava Šrutová aperis junaj artistoj Tomáš Fiala (tenoro), Ema Hubácková (soprano) kaj Alžbeta Rablová (alda violono). Sed ankaŭ amatoroj koncertis: Štepánka Rousková-Poulová (kanto), kaj Zuzanka Urbanová (Violono), 11-jara laŭreatino de muzikaj konkursoj por junularo. La aŭskultantoj ĝuis verkojn de grandaj komponistoj (Dvor á k, Smetana, Suk, Mozart, Verdi, Schubert, Puccini, Weber, Moniuzsko, Godard, Marcello) en Esperanta vesto, sed ankaŭ teneran Lulkanton de nia pedagogo Jan Amos Komenio (17a jc.). Speciale interesa programero estis kantoj komponitaj de ĉeĥa esperantisto Lubomír Huf laŭ poemoj de bulgaraj esperantistaj poetoj Dimitro Denĉev kaj Penka Batoeva, kiujn kantis per sia nature agrabla voĉo Štepánka Rousková-Poulová.

-mm-

Iom da statistikoj:

Kongresanoj laŭ landoj (sub oblikva streko postaj aliĝintoj): Albanio 2, Alĝerio /2, Argentino 8/2, Aŭstralio 10, Aŭstrio 27, Belgio 92/4, Bjelorusio 5, Bosnio-Hercegovino 1, Brazilo 52/6, Britio 73/6, Bulgario 35/1, Ĉeĥio 371/8, Ĉinio 21, Danio 41, Estonio 19/3, Etiopio 1, Finnlando 77/1, Francio 214/5,Ganao /3, Germanio 332/12, Greklando 1, Hispanio 65/1, Hungario 64/12, Irano 18/5, Irlando 5, Islando 10, Israelo 26/3, Italio 114/4, Japanio 199/3, Jugoslavio 18, Kanado 7, Kazaĥio /3, Kolombio 1, Korea Resp. 30, Kostariko 1, Kroatio 31/4, Kubo 6, Latvio 39/1, Liĥtenŝtejno 1, Litovio 40/9, Luksemburgio 4, Madagaskaro 1, Makedonio 9, Malajzio 1, Malto 3, Meksikio 2/1, Mongolio 1, Nederlando 132, Norvegio 26, Pakistano 1, Pollando 191/3, Portugalio 7, Rumanio 12, Rusio 85/19, Slovakio 66/1, Slovenio 10, Svedio 96, Svislando 42, Taĝikio 3, Togolando 1/1, Turkio 4, Ukrainio 27/2, Usono 47/1, Venezuelo 3, Vjetnamio 2/1, Forpasintoj 5. Entute: 2837/133 = 2970.


Eŭroparlamentanoj subtenantaj Esperanton (EP-anoj/subtenantoj): Unio Por Eŭropo 54/14, Verduloj 20/5, Eŭropaj Liberaluloj Demokrataj kaj Reformantoj 52/8, Popola Partio Eŭropa (Kristan-Demokrata) 173/20, Partio de la Socialistoj Eŭropaj 217/24, Eŭropa Unuiga Maldekstro 33/2, Eŭropo De la Nacioj 19/1, Ne Enskribitaj 31/1. Entute 626/81.

Instituto pri kibernetiko serĉas anglalingvanon interesitan pri kibernetika estetiko por traduko de 120-paĝa lernolibro, skribita en Esperanto kaj la germana. Bv. kontakti KN 45 (Helmar Frank, Kleinenberger 16, D-33100 Paderborn, Germanio).

Aŭtoraj duonhoroj

Pintajn momentojn de kortuŝo atingis la prezento de la kroata aŭtorino Spomenka Ŝtimec dum la Aŭtoraj duonhoroj en la kongresa libroservo.

La aŭtorino estas konata kiel rakontisto de amoj kaj disiĝoj, vojaĝoj kaj dummilitaj spertoj - ĉio nedisigeble ligita al Esperantujo, kie ŝi hejmas. La lastan parton de sia prezento Spomenka dediĉis al sia lasta verko, "Tena", kiu portretas per la figuro de ŝia avino Mezeŭropon tra nia jarcento. Fine de sia parolado, kiun atente sekvis pli ol 50 aŭskultantoj, la verkistino aŭtografis siajn verkojn.

Per deklamo de "epopeo" pri "ŝtata kato", kiu malaperis sed poste reaperis en la rezidejo de la brita ĉefministro, Marjorie Boulton amuzis ĉirkaŭ 40 aŭskultantojn. Responde al demando la eminenta aŭtorino malkaŝis, ke pli kaj pli ŝi konsideras verki libron pri siaj memoroj ĉar - kiel ŝi diris - kvankam ŝi ne trovas sian propran vivon tro interesa, ŝi renkontis interesegajn homojn en Esperantujo kaj tre logas ŝin esplori "kial iu personeco estas tia, kia ĝi estas".

Demandita pri sia amo al katoj la doktorino respondis, ke ŝi ŝatas ilin, ĉar "ne estante alies edzoj ili estas kareseblaj kaj ronronas."

Televida intervjuo pri la 81-a UK

Marde la 23-an la ŝtata Ĉeĥa televido elsendis en la tre ŝatata kaj multe rigardata programo "Studio 6" mallongan programeron pri la Praga kongreso kaj pri Esperanto ĝenerale. Intervjuitoj estis LKK prezidanto Vl. Koc vara kaj komitatano de Ĉeĥa Esperanto-Asocio Vlad. Hasala. Oni donis bazajn informojn pri ekesto de la lingvo kaj pri nuna stato de la movado. Ne mankis mencioj pri gravaj sesioj enkadre de la kongreso.

kov

AIS transdonas Premion "Germain Pirlot"

Kadre de la inaŭguro de SUS 16, kiu merkrede je la 9-a okazas en Hotelo Forum, AIS transdonas la Premion "Germain Pirlot" por la jaro 1995. La premio iras al la sciencistoj Reinhard Selten kaj Jonathan Pool pro ilia verko "Enkoduko en la teorion de Lingvaj ludoj - ĉu ni lernu Esperanton?"

La Premio Pirlot estas ĉiujare aljuĝata al scienca verko, kiu almenaŭ duone estas en Esperanto. En 1996 la premion ricevis la Ukraina medicinisto I. Galajĉuk pro la kongresvolumo "10-a Internacia Medicina Esperanto-Konferenco" redaktita de li.

Reinhard Fössmeier, Inform-ofico de AIS


ATENTON: Okazas, ke skribemuloj el inter la kongresanaro forgesas siajn salutkartojn afranki aŭ afrankas ilin ne sufiĉe. Tiujn la giĉeto "Filatelio" ne transdonas al poŝto por ekspedo, ĉar oni devus punpage elspezi duoblan sumon por afranko. Tiuj ĉi sendaĵoj estas metitaj flanken kaj ne atingos siajn adresatojn! Bonvolu, do, kontroli, ĉu ankaŭ vi ne estas inter la forgesuloj!

BAHAANOJ KUNSIDIS:

Lunde en salono Pumpr fratece kunsidis ĉirkaŭ 70 homoj por debati kun B.E.L. kiel antaŭenigi daŭre prosperantan kulturon. Per ekzemploj de protektado kaj kultivado de la kultura heredaĵo laŭ la principo "Unueco en Diverseco". S-ino Otto rakontis pri la lukto de bahaaj indianoj en Panamo kontraŭ "Koka-Kolismo" por savi sian kulturon. S-ino Schouten-Boys priskribis la klopodojn de la Bahaa Asocio por la Artoj por vivigi riĉan kaj buntan kulturon de la homaro interalie per Esperanto. Poste okazis diskuto por provi difini, ĉu kulturo estas valoro aŭ varo. La Aŭstraliaj aboriĝenoj montras al ni, ke kulturo povas esti preskaŭ sen varoj kaj ke misuzataj varoj povas mortigi la esencajn valorojn. Sed la homaro de longe ne plu vivas en la praa ŝtonepoko: Ĝi bezonas varojn, sed tiuj varoj nepre devas resti valoraj. Tiel diris Bauŕ’u’llá n’ (fondinto de la Bahaa kredo) dum la dua parto de la 19a jarcento: la problemoj de la homaro estu solvitaj nur per unueco kaj per "spiritaj", kulturaj rimedoj.

Supren
UEA, 2022