Pardonpeton!

La vera aspekto de la retejo ne povas por esti korekte rigardata per via retumilo.
La adreso:
Universala Esperanto-Asocio
Nieuwe Binnenweg 176, 3015 BJ Rotterdam, Nederlando
tel.: +31 10 436 1044
faks.: +49 30 364280169
rete: vidu la liston
 
Gazetaraj Komunikoj de UEA
2022  2021  2020  2019  2018  2017  2016  2015  2014  2013  2012  2011  
2010  2009  2008  2007  2006  2005  2004  2003  2002  2001  2000  1999  
1998  

N-ro 317 (2009-03-11)
Libroservo de UEA vendis por 125125 eŭroj

Kun 349 ekzempleroj la gvidilo "Internaciaj Ekzamenoj de ILEI/UEA", lanĉita en la 93-a UK, estis la plej furora titolo de la Libroservo de UEA en 2008. Ĝi ne estis aĉetebla dum kvin jaroj, kio akumulis tian bezonon, ke en kvin monatoj ĝi saltis al la pinto de la tutjara statistiko. Post ses jaroj sur la unua loko, "Vojaĝo en Esperanto-lando" de Boris Kolker (229) estis la tria; la duan lokon okupis la adresaro de Pasporta Servo (284). Furoris ankaŭ la artikolaro de Ulrich Lins pri la historio de UEA, "Utila Estas Aliĝo" (214), aperinta en la antaŭlasta tago de la UK.

Ses pliaj libroj atingis pli ol 100-ekzempleran kvanton: la ekzercilo "Poŝamiko" de B. Allée kaj K. Kováts (186), "Gerda malaperis!" de Claude Piron (181), la gvidilo pri la kvartalo de la CO "Tuj apude" de Humphrey Tonkin (170), la enkonduka libreto "La Komuna Eŭropa Referenckadro" (145), la elementa lernolibro "Saluton!" de A. Childs-Mee (107) kaj "Ksenofobia gvidlibro al la nederlandanoj" de R. Bolt (106).

La vendoj sumiĝis je 125125 EUR (122420 en 2007). Estis venditaj 13707 ekzempleroj de 2554 malsmaj libroj kaj diskoj, ne enkalkulante insignojn, glumarkojn k.s. Entute 662 klientoj aĉetis poŝte aŭ surloke en la CO almenaŭ unufoje dum la jaro, sed tiu nombro ne inkluzivas la klientojn de la kongresa libroservo dum la 93-a UK.

Pli detalaj informoj pri la vendoj en 2008 aperas en la marta numero de la revuo "Esperanto".

Mallonga ligilo por tiu ĉi komuniko: www.uea.org/gk/317a1

N-ro 320 (2009-04-12)
Eŭropa lingvoekzameno dum la Malferma Tago

Dum la Malferma Tago de la Centra Oficejo de UEA (sabato, 25 aprilo) eblos ekzameniĝi pri la scio de Esperanto sur la nivelo CI laŭ la Eŭropa Referenckadro. Ambaŭ partoj de la ekzameno (skriba kaj buŝa) okazos posttagmeze, tiel ke la ekzamenatoj povos sekvi ankaŭ parton de la programo de la Malferma Tago, kiu komenciĝos je la 10-a horo. Por akiri ateston pri la ekzameno necesas sukcesi en ambaŭ partoj.

Priskribon de la postuloj kaj liston de la pagendaj kotizoj  oni trovas en submenuoj de la paĝo http://www.edukado.net/pagina/NOVAJ+UEA-EKZAMENOJ/22422/, kie troviĝas ankaŭ novaĵoj pri la ekzamenoj kaj kalendaro de la estontaj sesioj. Aparte konsilinda estas la ĵus aperinta libro Esperanto de nivelo al nivelo (10,50 EUR), kiu enhavas ĉiujn necesajn informojn kaj seriojn de specimenoj je ĉiu nivelo de la ekzamensistemo.

Al la ekzameno dum la Malferma Tago oni antaŭanoncu sin ĉe la CO de UEA (rete: direktoro@.spamaĵo?co.uea.org; telefone +31 10 4361044).

Mallonga ligilo por tiu ĉi komuniko: www.uea.org/gk/320a1

N-ro 319 (2009-03-30)
Clerici finis rezultoriĉan laboron

Ranieri Clerici, vicprezidanto de Universala Esperanto-Asocio, anoncis en la kunsido de la Estraro la 29-an de marto sian decidon rezigni pro sanproblemoj pri estraraneco kun tuja ekvalido. La aliaj estraranoj akceptis la sciigon de sia kolego kun granda bedaŭro.

Krom funkcii kiel unu el la du vicprezidantoj, Clerici respondecis pri la eksteraj rilatoj de UEA. Sub lia gvido okazis sur tiu kampo rimarkinda plivigliĝo de la agado, precipe ĉe Unuiĝintaj Nacioj kaj ĉe Unesko. La plej elstaraj eventoj tiurilate estis la aprila simpozio pri lingvaj homaj rajtoj ĉe la sidejo de UN en Ĝenevo kaj la decembra lanĉo de la Zamenhof-jaro en la ĉefsidejo de Unesko en Parizo. Ĉe la ĉefaj oficejoj de UN kaj Unesko deĵoras nun aktivaj kaj entuziasmaj reprezentantoj de la Asocio.

Ĉar dank' al la laboro de Clerici la eksteraj rilatoj de UEA disvolviĝas sur sufiĉe solida bazo, la Estraro ne proponos al la Komitato alelekton de nova estrarano por la restanta mandatperiodo, t.e. ĝis la UK 2010, kie nova Estraro estos elektita.

Mallonga ligilo por tiu ĉi komuniko: www.uea.org/gk/319a1

N-ro 321 (2009-04-15)
IKU en Bjalistoko: kremo el 30 proponoj

La membroj de la Komsiono de UEA pri la Internacia Kongresa Universitato (IKU) havis ĉi-jare nekutime multe da laboro, ĉar ili devis ekspertizi entute 30 prelegproponojn por la 62-a sesio de IKU en la 94-a UK en Bjalistoko (25 julio – 1 aŭgusto 2009). La Estraro de UEA, kiu aprobis la finan programon de IKU, sekvis la rekomendon de la Komisiono. 

La Bjalistoka IKU-sesio konsistos el jenaj prelegoj:   

Tomasz Chmielik: Kvin urboj de fratoj Goskind;

Barbara Despiney: Pol-litova Unio: respubliko de multaj nacioj;

Nicolau Dols Salas: Perspektivoj en fonetika kaj fonologia esplorado de Esperanto;

Mark Fettes: Ĉu eblas kultivi imagipovon? Enkonduko en radikalan edukteorion kaj praktikon;

Mauro La Torre: Nombrado: ila, vorta, cifera;

Árpád Máthé: Esperantistaj redaktoroj de Zamenhof kaj aliaj pioniroj ĝis la nuntempaj;

Otto Prytz: La invento de la jubileulo Louis Braille - daŭrigebla kaj daŭriginda;

Tsvi Sadan (Tsuguya Sasaki): Socilingvistika komparo de du diasporaj lingvoj, la jida kaj Esperanto, en Interreto;

Amri Wandel: Teleskopoj - de Galileo ĝis la spacteleskopo.
 

La prelegoj de Nicolau Dols Salas, Tsvi Sadan kaj Amri Wandel estos samtempe kursoj de Akademio Internacia de la Sciencoj (AIS). La tradicio de kunlaboro inter IKU kaj AIS komenciĝis en la Tamperea UK en 1995. Ĉiu dumkongresa AIS-kurso konsistas el tri prelegoj, el kiuj la unua estas IKU-prelego, sekvata de du daŭrigaj prelegoj, en kiuj la preleganto prezentas sian temon pli profunde kaj vaste. 

La prelegtekstoj aperos kiel t.n. IKU-libro, lanĉota en la UK. En la Libroservo de UEA estas ankoraŭ haveblaj IKU-libroj de kelkaj antaŭaj jaroj. Pluraj IKU-libroj kaj la resumoj de la ĉi-jaraj prelegoj estas konsulteblaj ankaŭ en la kongresa retejo: 

 http://www.uea.org/dokumentoj/IKU/index.html