Disvastigo:
Informi la neesperantistojn

En Italio ekzistas eksterdordinara esperantisto, Giorgio Bronzetti, kiu opinias, ke malmultaj lernas Esperanton, simple ĉar neniu parolas al ili pri ĝi. Ĉefe la ĵurnaloj daŭre parolas nur pri la angla kaj la neceso lerni la anglan. Nu - Giorgio diris iun tagon: kial ni ne starigas sistemon por disdoni informojn al la gazetaro en la nacia lingvo pri lingvaj problemoj kaj pri Esperanto? Ĉar li apartenas al tiu speco de esperantistoj, kiuj ne atendas ke aliaj faru sed faras mem, li komencis puŝi siajn geamikojn starigi la sistemon, kaj nun la sistemo en Italio funkcias. Ĝia nomo estas Disvastigo (ĝuste tiel en Esperanto!), kaj ĝi ne nur donas informojn al la gazetoj, sed ankaŭ al la parlamentanoj.

Ĝi kunlaboras kun la Komunikad-Centro en Bruselo, kaj multaj aliaj.

Giorgio evidente ĉerpas siajn informojn el pluraj fontoj kaj el pluraj listoj, interalie el e-inf@yahoogroups.com, kiu liveras tiajn tradukeblajn informojn al ĉiuj esperantistoj.

Mi scias ke kelkaj landoj havas propran sistemon similan, sed estus bele, se multaj landoj celus starigi similan sistemon. Giorgio pravas pri tio, ke neniu lernos Esperanton, se neniu parolos al la publiko pri lingvaj problemoj kaj Esperanto. Ĉar neniu potenca grupo volas fari tion, eble ni mem faru kiel Giorgio.

Renato Corsetti