La jaro 1999 fariĝas por UEA jaro kun aliĝo de pli da novaj dumvivaj membroj ol normale dum la pasintaj jaroj. Ĝis la fino de septembro UEA ricevis jam 15 novajn dumvivajn membrojn, dum en la tuta antaŭa jaro ilia nombro estis 13. Lastatempe la Centra Oficejo krome ricevis pli da informpetoj pri la kondiĉoj de dumviva membreco ol kutime.
La subita populariĝo de dumviva membriĝo ŝajne ligiĝas al la specialeco de la nuna momento. Sendepende de tio, ĉu la dua jarmilo finiĝas en 1999 aŭ nur en 2000, ni estas sojle de nova jarmilo. Kiu fariĝas nun dumviva membro, ne plu bezonos zorgi pri kotizo post tiu sojlo.
La membrokotizo de UEA por la tuta tria jarmilo kostas nur 25-oblon de
la unujara kotizo de Membro-Abonanto. Se oni pagas ĝin ankoraŭ
en 1999, oni kalkulas ĝin surbaze de la ĉi-jara MA-kotizo. Por
pluraj landoj la UEA-kotizoj de 2000 tamen estos malpli altaj ol tiuj de
1999. En tiuj landoj oni rajtas jam ĉi-jare kalkuli la dumvivan kotizon
surbaze de la malpli alta tarifo. Eblas interkonsenti kun la Centra Oficejo
ankaŭ pri pago en partoj ene de unu jaro.