(R)estu membro de la E-komunumo!
Renato Corsetti, Prezidanto de UEA
Mi volas rediri al vi, kial indas esti kaj resti membro de la Esperanto-komunumo.
La samon pli-malpli mi jam diris pasintjare, kaj mi restas nun samopinianta.
Esence al la ĉiama demando: "Kial finfine mi devus aliĝi al la
loka Esperanto-klubo, al la nacia landa asocio, al la asocio de mia fako
aŭ hobio, al Universala Esperanto-Asocio?" mi kutimas respondi, ke
ekzistas almenaŭ du kialoj:
- La Esperanto-asocioj je ĉiuj niveloj laboras por pli bona mondo,
por mondo sen lingva kaj kultura diskriminacio; mallonge dirite, ili laboras
por lingva demokratio. Se vi opinias, ke tiu estas bona celo, vi certe
volas subteni ilin. Aliĝante al via loka klubo aŭ al monda,
nacia aŭ faka asocio (eventuale eĉ al ĉiuj tiuj), vi estos
parto de tiu tutmonda Esperanto-movado, kiu de pli ol unu jarcento laboras
por homaj lingvaj rajtoj je ĉiuj niveloj, kaj kiu provas konvinki
la mondon, ke ankaŭ en la lingva-kultura kampo justeco valoras pli
ol forto.
- Samtempe vi eble ŝatas simple esti parto de la komunumo, kiu parolas
la internacian lingvon Esperanto. Vi eble ŝatas renkonti aliajn parolantojn
de Esperanto, vi ŝatas aĉeti librojn en Esperanto, vi ŝatas
vojaĝi al fremdaj landoj, koni ties loĝantojn kaj eventuale
eĉ esti gastigata de lokaj esperantistoj. Ĉion ĉi la membroj
de Esperanto-asocioj faras des pli nature, estante daŭre informataj
per siaj asociaj ligoj pri la revuoj, la libroj, la kongresoj, la ret-listoj
kaj la ret-paĝoj, la korespond-anoncoj kaj la vojaĝ-ebloj je
sia dispono. Kaj se vi apartenas al la komunumo de tiuj, kiuj normale
ŝaltas sian komputilon antaŭ la matenmanĝo, vi trovos (aŭ
jam trovis), ke esperantistoj ĉeestas pli kaj pli en la tutmonda
reto kaj serĉas kontaktojn kun similaj esperantistoj. La avantaĝoj
de asocia membreco estas similaj ankaŭ ĉi-kaze. Ekzistas diversaj
diskutgrupoj por UEA-membroj, ekzemple, kaj nuntempe ankaŭ eksperimenta
eblo ricevi la revuon Esperanto per Interreto en komputila formato.
Do estas grave, ke vi klopodu aliĝi al Esperanto-organizaĵoj
je ĉiuj niveloj (loka, landa, faka aŭ internacia). Ni kompreneble
invitas vin aliĝi aŭ re-aliĝi al UEA, sed ankaŭ se vi
aliĝas nur al faka asocio aŭ al via loka klubo, tio jam estas
io bona; kaj se vi aliĝas ankaŭ al via landa asocio, tio estas
io ankoraŭ pli bona, ktp.
UEA pretas ĉiukaze sendi al aranĝantoj de naciaj aŭ lokaj
renkontiĝoj stokon da revuoj de UEA de la pasinta jaro kune kun cirkuleroj
por dis- donado al la partoprenantoj - oni devas tiurilate nur peti la Centran
Oficejon. La celo de nia kampanjo estas "vastigi la komunumon", tio estas
vastigi la nombron de organizitaj kaj interligitaj esperantistoj je ĉiu
nivelo. Nia ĉefa celo estas ke la membroj de ĉiuj Esperanto-organizaĵoj
pliiĝu kaj estu en kontakto inter si. Oni vastigas la komunumon ĉefe
per informado pri Esperanto kaj instruado de Esperanto, sed ankaŭ tio
estas senefika en la longa daŭro, se la parolantoj de Esperanto ne
poste iel restas kune.
Ni restas je via dispono por kunlabori kun vi pri tiu ĉi celo.
renato.corsetti @ co.uea.org
